記第二屆台灣文史營 董峰政

頭屆土城文史營，學員躍踴真奢颺，

二屆學員百二名，漁夫總幹叫阿娘。

漁夫人面真曠闊，邀請拜託卡快活，

講師陣容通海外，個個落入伊算盤。

研習活動真豐沛，名人個個請出來，

報章媒體爻舖排，漁夫暢甲落下頦。

漁夫作風信大牌，毋是名人伊無拜，

若是爻人伊上愛，為著土城的光彩。

漁夫看人無大細，台灣意識做主體，

統派猶原照交陪，兩爿攏無失著禮。

漁夫用心閣計較，文史陣營攏摷到，

五暝六日真腥臊，學員食甲褲帶敨。 (敨tàu)

轟動武林文史營，風聲飛到東京城，

外國大使來讚聲，本土文化國際行。

母語一旦若失聲，請問啥人是阿娘，

褒歌一唱好心情，阿娘的話向前行。

註：2000年7月18日第二屆台灣文史營，由大師」之稱的鹿耳門漁夫執掌大旗擔任總幹事，伊用企業家的行銷史營辦甲真交易(gā-iah)，有感而寫。